STR8OUT започна како радио емисија за соочување со и разобличување на доминантните политики на срам предизвикани од вековните практики на насилство врз маргинализираните и исклучените, политики кои се креираат врз дехуманизирачки и деградирачки основи и репродуцираат атмосфера на страв, срам, инфериорност, неправедност и нееднаквост. Слушателите беа воведувани во теми и повикани на дискусија за феминизмот, нормативноста и нејзината критика, сексуалноста, родот и родовите теории, квир теориите и квир културата, граѓанскиот активизам и ЛГБТИ.

STR8OUT се емитуваше секоја втора среда од 12:15 на брановите на Радио МОФ а слушателите имаа можност да ги споделуваат нивните мислења, забелешки и сугестии на твитер со хаштаговите #str8out и #radiomof.

Денеска STR8OUT прерасна во интернет портал за вести и информации поврзани со ЛГБТИ во Македонија и светот. Фокусот на вестите и информациите кои се објавуваат на порталот се релевантни за опкружувањето во кое ЛГБТИ лицата во Македонија живеат, а исто така, имаат и цел да мобилизираат и ангажираат.

Целта на порталот STR8OUT е да придонесе кон суштинско известување и едуцирање на пошироката публика за прашања од важност за ЛГБТИ лицата, како и да придонесе кон поангажирано и помобилизирано движење за ЛГБТИ во Македонија и пошироко.